അങ്ങാടിപ്പുറം രാമപുരം നാലമ്പലങ്ങൾ

അങ്ങാടിപ്പുറം രാമപുരം നാലമ്പലങ്ങൾ

പെരിന്തൽമണ്ണ നിന്ന് മലപ്പുറം റൂട്ടിൽ പുഴക്കാട്ടിരിയിലാണ് രാമപുരം. റോഡ് സൈഡിൽ തന്നെ ക്ഷേത്ര കമാനം കാണാം. ഈ അടുത്ത കാലത്തായി ക്ഷേത്രം കൂടുതൽ പ്രശസ്തമായി വരുന്നു. തൃപ്രയാർ, ഇരിഞ്ഞാലക്കുട, മൂഴിക്കുളം, പായമ്മൽ നാലമ്പലങ്ങളിലെ അഭൂതപൂർവമായ തിരക്ക് ഒരുപക്ഷെ ഈ നാലമ്പലങ്ങളുടെ വളർച്ചക്ക് വഴിതെളിച്ചിട്ടുണ്ടാകാം.

പ്രധാന പ്രതിഷ്ഠ ശ്രീരാമൻ. കിഴക്കോട്ടാണ് ദർശനം. ഉപദേവതകളായി ശിവൻ, വിഷ്ണു, ഭദ്രകാളി. ഒന്ന് രണ്ടു പേരോട് ചോദിച്ചെങ്കിലും ഏറെ ഐതിഹ്യ കഥകളൊന്നും അവർക്ക് അറിയാമായിരുന്നില്ല.
ഭരതൻ, ലക്ഷ്മണൻ, ശത്രുഘ്നൻ തുടങ്ങിയവരുടെ ക്ഷേത്രങ്ങളും ഒന്ന് രണ്ടു കിലോമീറ്റർ ചുറ്റളവിൽ ഉണ്ട്. ശ്രീരാമ ക്ഷേത്രത്തിനു അടുത്ത് തന്നെയുള്ള പനങ്ങാങ്ങര ലക്ഷ്മണ ക്ഷേത്രവും പുറക്കാട്ടിരിയിൽ ശത്രുഘ്ന ക്ഷേത്രവും. എല്ലാം ചെറിയ ക്ഷേത്രങ്ങൾ ആണ്. ഭരത ക്ഷേത്രത്തിലേക്ക് അല്പം കൂടുതൽ പോകണം. വഴിയും അത്ര നല്ലതാണെന്നു പറയുക വയ്യ.

ഈ ക്ഷേത്രങ്ങൾ നശിപ്പിക്കപ്പെട്ട നിലയിൽ ആയിരുന്നുവെന്നും ഇപ്പോൾ ചെറിയ തോതിൽ അഭിവൃദ്ധി പ്രാപിച്ചു വരികയാണെന്നും പ്രത്യക്ഷത്തിൽ തന്നെ മനസിലാക്കാം.

രാമപുരം നാലമ്പലങ്ങൾ പോകുന്ന വഴി പ്രസിദ്ധമായ അങ്ങാടിപ്പുറം തിരുമാന്ധാംകുന്ന് ക്ഷേത്രത്തിലും അതിനു അടുത്ത് തന്നെയുള്ള തളി ക്ഷേത്രത്തിലും ദർശനം നടത്താം എന്നൊരു പ്രത്യേകത കൂടിയുണ്ട് മലപ്പുറം ജില്ലയിലെ ഈ നാലമ്പല ദർശന യാത്രയിൽ.